Ба гузориши “Ховар”, Президенти Тоҷикистон рӯзи 5 декабр дар мулоқот бо додрасҳои Додгоҳи Олии Тофикистон изҳор дошт: Таҳлилҳо нишон медиҳанд, ки бо вуҷуди тадриҷан беҳтар гардидани кори додрасҳои дар муҳокимаҳои додгоҳӣ, дар фаъолияти онҳо ҳанӯз ҳам камбудию норасоиҳо, аз ҷумла риоя нагардидани муҳлати баррасии парвандаҳо, сари вақт ба тарафҳо насупоридани санадҳои додгоҳӣ, бекоршавии санадҳои қазоӣ ва беэҳтиромӣ нисбат ба шаҳрвандон ба назар мерасанд.
Эмомалӣ Раҳмон дар дидор бо додрасҳо гуфт: Бархе аз додрасҳо дар баррасии парвандаҳо беаҳаммиятӣ зоҳир намуда, ба далелҳо баҳои дурусти ҳуқуқӣ намедиҳанд ва ҳолатҳои барои парванда аҳаммиятдоштаро ҳаматарафа намесанҷанд.
Президенти Ҷумҳурии Тоҷикистон афзуд: Чунин тарзи муносибат боиси татбиқи нодурусти қонунҳо, қабули санадҳои ғайриқонунӣ ва дар ниҳоят, бекор шудани қарорҳои қабулкардаи онҳо мегардад. Бо ҳамин сабаб давоми солҳои 2020 – 2023 ва нуҳ моҳи соли 2024 аз ҷониби додрасҳои болоӣ беш аз 1700 ҳукми додрасҳои поёнӣ бекор гардидааст.
Тибқи иттилои расмӣ, наздики 1400 ҳолати риоя нагардидани муҳлати баррасии парвандаҳо ба сабт расида, аз ҷониби Додгоҳи Олӣ 2320 муроҷиати шаҳрвандон дар хусуси кирдори додрасҳо ва кормандони дастгоҳи қазо баррасӣ гардидааст.
Эмомалӣ Раҳмон гуфт: Ҳуқуқвайронкунӣ ва ба вижа ба кирдорҳои ҷиноӣ даст задани бархе аз додрасҳо ҳоло ҳам ҷой доранд ва чунин вазъ боиси нигарониву ташвиши ҷиддии мо гардидааст.
Раисҷумҳури Тоҷикистон дар мулоқот бо додрасҳо, аз онҳо даъват кард, ки шаъну шарафи додрасиро ҳифз кунанду ба мардум содиқонаву беғаразона хидмат намоянд.
342/
