Дар ҳоле ки Амрико аз наслкушии режими саҳюнистӣ дар Ғазза ҳимоят мекунад, давлати Байден барои татҳири худ бидуни ишора ба решаҳои хушунати давлатӣ алайҳи мусулмонон дар Амрико, ба сурати намодин санади «Мубориза бо исломҳаросӣ»-ро тасвиб ва дар 12 декабр санади «Роҳнамои стратегӣ»-ро барои мубориза бо исломҳаросӣ ва нафрати зидди араб мунташир кард. Санаде ки вокунишҳои манфии зиёдеро барангехтааст.
Торнамои “Middle East Eye” дар гузорише таҳти унвони «Ҳаракоти намодин» дар ин бора навишт: Ин роҳнамои стратегии Кохи Сафед сирфан охирин намоиш аз таомули сатҳӣ ва умдатан намодини давлати Байден бо ҷавомеи мусулмон аст. Дар ин гузориш гуфта шудааст: Мусулмонони Амрико ба як робити мусулмон дар Кохи Сафед эҳтиёҷ надоранд. Онҳо ниёз доранд то ба хушунати давлатӣ алайҳашон поён дода шавад.
Ба гузориши “Порс-Тудей”, дар бахши дигари ин гузориш бо ишора ба шиори Байден дар ин матн дар мавриди таҳаққуқи «Озодӣ ва фурсат барои ҳама дар Иёлоти Муттаҳида» омадааст: Чунин иддаоҳое бо тавваҷуҳ ба мероси таърихӣ ва ҳамешагии наслкушӣ, ба ҳошия ронда шудан, тард шудан ва ваҳшигарии ин давлати истеъмории дурӯғин ҷилва мекунад. Аммо бахши хашини ин устурасозӣ он аст, ки бо вуҷуди ин дурӯғи ошкор, имрӯзҳо ҳанӯз ба кори худ идома медиҳад.
Пас аз понздаҳ моҳ аз ҷанги Ғазза ва наслкушии фаластиниҳо тавассути режими саҳюнистӣ, ки мавриди ҳимояти Амрико будааст, ин санад охирин иқдоми Кохи Сафед дар қиболи ҷавомеи арабу мусулмон дар Амрико ба шумор меравад. Ин дастуруламал ё роҳнамои стратегӣ бо баёнияи Ҷо Байден дар вокуниш ба бурида шудани сари Водиё Ал-Фаюма, писари мусулмони фаластинӣ - амрикоии шашсола тавассути соҳибхонааш шурӯъ шудааст. Сипас ин санад бо ташбеҳи фазои кунунии Иёлоти Муттаҳида ба давраи пас аз ҳамалоти 11 сентябр, ки дар он мусулмонон, аъробу шаҳрвандони осиёӣ ҳадаф қарор мегирифтанд, зимни такрори суханони Байден дар маҳкумияти хушунат алайҳи ин ҷавомеъ, нақши давлат дар ба ҳошия рондани ин масъаларо камранг мекунад.
Бо ин ҳол Байден як намунаи хос аз хушунати давлатиро барҷаста карда, ки он ҳам мамнуият барои мусулмонон тавассути Доналд Трамп аст. Вай сипас аз худаш ситоиш мекунад, ки сиёсати иштибоҳи мамнуияти сафар ба Амрикоро дар аввалин рӯзи раёсати ҷумҳурии худ лағв кард.
Давлати Байден бо вуҷуди шиори мубориза бо исломҳаросӣ, аммо дар амал бо ҳимояти комилу ҳамаҷониба аз Исроил барои наслкушӣ ва куштори фаластиниҳо дар Ғазза аз як сӯ ва беэътиноӣ ба нақзи ҳуқуқи мусулмонону аъроб дар Амрико ва эъмоли анвои маҳдудиятҳову хушунат алайҳи онҳо, дар амал худ ба як омили бузурги исломҳаросӣ ва хушунатпароканӣ алайҳи мусулмонон табдил шудааст .
Дар ин замина Майкл Кейси, муовини собиқи сиёсии дафтари умури Фаластин дар Вазорати хориҷаи Амрико бо интиқод аз сиёсати давлати Ҷо Байден дар Ғазза гуфт: «Вашингтон нигарони дарду ранҷи фаластиниҳо несту манофеи Исроилро дунбол мекунад. Ин ки давлати Амрико дар муқобили хостаҳои Исроил таслим шуда ва бо вуҷуде, ки медонад иқдомоти он дар Ғазза иштибоҳ аст, аз он ҳимоят мекунад, комилан шармовар аст».
Ин амр хашму интиқодҳоро барангехтаву раиси ҷумҳурии демократи Амрико лақаби «Ҷои наслкуш»ро гирифта аст.
Аз сӯи дигар, иддаоҳои давлати Байден дар ин санад мабнӣ бар зарурати истодан дар баробари нафратпароканӣ алайҳи мусулмонон дар кишваре озоду мубтанӣ бар адолат, бар хилофи воқеиёти айнӣ дар Амрико аст. Чунин иддаоҳое на танҳо хушунати давлатиро нисбат ба бисёре аз ҳамон гуруҳҳое, ки иддао мекунанд, дар баробари ҷиноёти ношӣ аз нафрат аз онҳо муҳофизат мекунанд, камранг ҷилва медиҳад, балки бо мутақоид кардани ҷавомеи ҳадаф (дар инҷо мусулмонону арабҳо) ба инки давлати Амрико дар амал ба амнияту рифоҳи онҳо алоқаманд аст, ба дунболи гумроҳсозиву ором кардани онҳост.
Исломҳаросии созмонёфта дар Амрико ҳар рӯз абъоди ҷадидтаре пайдо кардаву мунҷар ба шаклгирии исломситезӣ, яъне бархӯрдҳои амалӣ бо Ислому мусулмонон шудааст. Ин бархӯрдҳо абъоди мухталифи сиёсӣ, иҷтимоӣ ва расонаӣ ва акнун физикӣ пайдо кардааст.
Мавҷи исломҳаросии густардаву барномарезишуда дар қолабҳову шаклҳои мухталифи расмӣ ва ғайрирасмӣ буруз ёфтаву зимни тарсими чеҳрае мағшушу таҳрифшуда аз Ислому мусулмонон, маҳдудиятҳо ва фишорҳои равониву қонунии бисёреро бар мусулмонони сокини Амрико таҳмил намудааст. Дар айни ҳол, мавзегириҳову амалкарди бархе мақомоти амрикоӣ дар ростои густариши исломҳаросӣ ва тарвиҷкунандаи хушунат алайҳи мусулмонон аст. Ба вижа, Доналд Трамп, раиси ҷумҳурии собиқи Амрико аз ҳизби ҷумҳурихоҳ сардамдори исломҳаросӣ ва эҷоди нафрат аз мусулмонон дар Амрико ва Ғарб будааст.
Аз сӯи дигар дар Амрико исломситезӣ ва эъмоли табъизу хушунатҳои каломиву физикӣ алайҳи мусулмонон бо тавваҷуҳ ба рушди чашмгири гуруҳҳои ростгарои ифротӣ, ба вижа дар давраи раёсати ҷумҳурии Доналд Трамп, раванде афзоишӣ пайдо кардааст. Ҳамла ба масоҷиду оташ задани амокини ибодии исломӣ, ҳамалоти физикӣ ва лафзӣ алайҳи мусулмонон ва ҳатто ғиримусулмононе, ки зоҳире шабеҳ ба мардуми кишварҳои исломӣ дар Ғарби Осиё доранд ва табъиз алайҳи пайравони Ислом дар мавориди мухталифи таҳсиливу шуғлӣ, бархе аз намунаҳои исломситезӣ ва афзоиши нафратпароканӣ алайҳи мусулмонон маҳсуб мешаванд.
