Камоли Харрозӣ, раиси Шӯрои роҳбурдии равобити хориҷии Ҷумҳурии исломии Эрон рӯзи душанбе дар гуфтугӯ бо шабакаи хабарии “Алмаёдин”-и Лубнон, талошҳо барои барандозӣ дар Эронро ҷадид надонисту афзуд: Ин талошҳо аз аввали инқилоби исломӣ буда ва табиӣ аст, ки Эрон ҳар таҷовузе ба худро посух хоҳад дод. Чунончӣ то кунун посух дода ва агар бихоҳанд иқдоме дар хусуси мавзӯи ҳастаӣ алайҳи Эрон анҷом диҳанд, Теҳрон вокуниши мутаносибро дар замони лозим анҷом хоҳад дод.
Ба гузориши “Порс-Тудей”, Харрозӣ дар идома гуфт: “Тарҳи барандозии низом дар Эрон як пружаи амрикоӣ – исроилӣ аст, ки аз ибтидо ва аз замони пирӯзии инқилоби исломӣ дар Эрон матраҳ буда ва мо шеваҳои хасмонаву мутааддиди амрикоиро, ки ҳадафаш тағйири низом буда, таҷриба кардаем. Онҳо талош карданд низомро соқит кунанд. Сипас Саддомро барои сарнагунии низоми Эрон ҳимоят карданд ва пас аз он Эронро таҳти таҳрим қарор доданду ҳамаи роҳҳои хасмонаро озмуданд. Аммо ончӣ равшан аст, инки таҳримҳои ҳаддиаксарии онҳо шикасти муфтазеҳонае хӯрд.
Раиси Шӯрои роҳбурдии равобити хориҷии Ҷумҳурии исломии Эрон дар ин мусоҳиба, ҳамчунин бар омодагии ҳамзамони Эрон барои гуфтугӯ бо Амрико ва низ муқобила бо фишорҳо таъкид кард.
Харрозӣ афзуд: Ҷумҳурии исломии Эрон бояд дар муқобили таҳдидҳо қавӣ бошад. Ончӣ муқобили дасисаҳои онҳо боздорандагӣ эҷод мекунад, иқтидор аст. Эрон тавонмандиҳои зиёде дораду душманон низ аз имконоту потенсиалу тавони амалии Эрон огоҳӣ доранд.
Далоили суқути ҳукумати Башор Асад
Раиси Шӯрои роҳбурдии равобити хориҷии Ҷумҳурии исломии Эрон дар ин мусоҳиба, дар хусуси илали суқути ҳукумати Башор Асад низ бо баёни инки Амрико ҳамеша мухолифи ҳукумати Башор Асад ва хостори барандозии он буд гуфт: Иттифоқоти Сурия тарҳи амрикоӣ – исроилӣ аст.
Бар асоси эъломи Харрозӣ, албатта гуруҳҳо ва кишварҳои дигаре, аз ҷумла Туркия низ дар ин иттифоқот нақш ифо карданд. Туркия ихтилофоти ҷуғрофиёӣ - таърихӣ бо Сурия дошт ва ҳамин ангезае барои Туркия шуд то ҳимояти лаҷистику омӯзишӣ барои неруҳои муориз фароҳам кунад то битавонанд ворид Сурия шаванд.
Далели ҳузури неруҳои эронӣ дар Сурия
Харрозӣ дар бораи ҳузури неруҳои эронӣ дар Сурия ҳам гуфт: Ҳадафи аслии Эрон аз ҳимоят аз ҳукумати Башор Асад, мубориза бо гуруҳҳои такфирӣ, на фақат барои амнияти Сурия, балки барои амнияти Ироқу Эрон буд ва ба ҳамин далел бояд бо такфириҳо муқобила мешуд.
Ин дипломати эронӣ дар идома таъкид кард: Муоризон, ки зимоми ҳукумати Сурияро дар даст гирифтаанд, то имрӯз ҳеҷ рафторе зидди Эрон анҷом надодаанд. Аз ин рӯ, рафтору мавозеи Эрон дар қиболи муоризон, бар пояи рафтору мавозеи онҳо дар оянда аст ва барои Эрон истиқлол, ҳокимияту тамомияти арзии Сурия муҳим аст.
Далоили таҷовузи режими саҳюнистӣ ба хоки Сурия
Харрозӣ дар бораи далоили таҷовузи Исроил ба хоки Сурия низ гуфт: Бенёмин Натанёҳу, нахуствазири режими саҳюнистӣ дар соли 1996 ин масъаларо эълом кард, ки танҳо роҳи ҳалли масъалаи Фаластин сарнагун кардани давлатҳои ҳомии Фаластин аст ва бори дигар ин роҳбурд дар соли 2002 дар дохили Конгресси Амрико матраҳ шуд ва ончӣ дар ҳоли ҳозир рух дод, дар ҳақиқат иҷрои ин роҳбурд буду Амрико ҳам аз ин роҳбурд ҳимоят мекард.
