Ба гузориши хабаргузории Аҳлибайт(а) ـ Абна ـ дар соати аввалияи субҳи имрӯз чаҳоршанбе, неруҳои низомии Баҳрайн ба минтақаи Ад-Дураз дар ғарби Манама, юриш бурданд ва дар ҷараёни талош барои поксозии мазоҳири Ошуроӣ, як ҷавонро аз ноҳияи сар маҷрӯҳ карданд ва чанд нафари дигарро низ боздошт намуданд.
Ин юриш бо ҳадафи ҳазфи теъдоде аз намодҳои Ошуроӣ аз ҷумла муҷассамаҳои ҳунарӣ, мазиф (маҳалли азадорӣ) ва парчамҳои мазҳабӣ сурат гирифт. Неруҳои амниятӣ бидуни ҳамоҳангӣ бо Вазорати шаҳрдориҳо ё Идораи авқофи Ҷаъфария, иқдом ба тахриби ин маконҳо бо истифода аз булдузер карданд.
Ҷамъияти Ал-Вифоқ дар посте дар шабакаи иҷтимоии Икс (Твиттери собиқ) эълом кард, ки муҷассамаҳо ва мазифҳо бар рӯи заминҳои шахсӣ бино шуда буданд ва роҳи умумиро ишғол накарда буданд.
Ҷамъе аз сокинони минтақа бо неруҳои амниятӣ муқобила карданд, аммо бо хушунат посух дода шуданд. Дар ин даргирӣ, ҷавоне ба номи Ҳасан Ал-Анафуз аз ноҳияи сар осеб дид ва тавассути амбуланс ба бемористон мунтақил шуд.
Видеоҳое, ки тавассути ҷунбиши ҷавонони Ад-Дураз дар Инстаграм мунташир шуда, нишон медиҳад, ки Ал-Анафуз дар ҳоле ки парчами сиёҳе дар даст дошт ва дар баробари таҷаммуъи мусолиҳатомези мардум истода буд, бидуни ҳеҷ иқдоми таҳрикомезе, ҳадафи зарбаи яке аз маъмурон қарор гирифт ва ба шиддат захмӣ шуд.
Дар ҳамин ҳол, ҷамъе аз уламои минтақа бо маҳкум кардани ин иқдом, истифода аз зӯр барои ҳазфи намодҳои Ошуроиро таҳрикомез дониста ва онро таарруз ба озодиҳои мазҳабӣ ва боварҳои мазҳабии мардум тавсиф карданд. Уламои Ад-Дураз таъкид карданд, ки ин маросим солҳост бидуни эҷоди ихтилол дар зиндагии умумӣ ё хусусӣ баргузор мешавад.
Your Comment