Порс Тудей - Ҳамлаи шанбешаби ҷангандаҳои режими саҳюнистӣ ба Борикаи Ғазза, мӯҷиби шаҳодати дастикам 9 фаластинӣ аз ҷумла 5 кӯдак шуд.
Шаҳодати 9 фаластинӣ дар ҳамлаи ҳавоии Исроил ба Ғазза, таҷовузи режими саҳюнистӣ ба ҷануби Лубнону идомаи ҳамалоти Амрико ба шимоли Яман, гузидае аз охирин ахбори минтақаи Ғарби Осиё аст, ки дар ин бастаи хабарӣ мехонед:
Шаҳодати 9 фаластинӣ дар ҳамлаи ҳавоии Исроил ба Ғазза
Ҳамлаи шанбешаби ҷангандаҳои режими саҳюнистӣ ба Борикаи Ғазза, мӯҷиби шаҳодати 9 фаластинӣ, аз ҷумла 5 кӯдак шуд. Вазорати беҳдошти Фаластин дар Ғазза низ рӯзи шанбе эълом кард, ки дар 24 соати гузашта, 26 фаластинӣ дар ин минтақа шаҳид ва 70 нафар маҷрӯҳ шудаанд. Тибқи ин гузориш, аз 18 марти 2025 ва бо оғози мавҷи ҷадиди таҷовузҳои режими саҳюнистӣ зидди Ғазза токунӯн 921 нафар дар ин борика шаҳид ва 2 ҳазору 54 нафар маҷрӯҳ шуданд. Бо эҳтисоби ин шуҳадо, шумори шуҳадои Ғазза аз ҳафтуми октябри 2023 токунӯн ба 50 ҳазору 277 нафар расид.
Таҷовузи муҷаддади Амрико ба Яман
Амрикои шанбешаб дар ҳафт навбат устони Саъдаро ҳадаф қарор дод. Дар ин ҳамалот 3 навбат шарқи шаҳри Саъда бомбаборон шуду шаҳристони Оли Солим низ 4 бор ҳадаф қарор гирифт. Ҷузиёти бештаре дар бораи талафоти эҳтимолии ин ҳамалот мунташир нашудааст. Ҷангандаҳои амрикоӣ рӯзи ҷумъа ҳам 72 бор манотиқи Санъо, Саъда, Умрон, Маариб, Ал Ҷавф ва Ал Ҳудайдаи Яманро бомбаборон карданд.
Раиси Шӯрои олии сиёсии Яман: Ҳамалоти Амрико ва Исроил, миллати моро аз ҳимояти Фаластин боз нахоҳад дошт
Маҳдӣ Ал Машот, раиси Шӯрои олии сиёсии Яман дар суханоне ба муносибати Иди Фитр, зимни табрики ин ид ба муҷоҳидон дар ҷабҳаҳои мухталиф, маҷрӯҳон, асирону хонаводаҳои шуҳадои Яман гуфт: Дар ҳоле, Иди Фитрро ҷашн мегирем, ки бародарони мо дар Ғазза таҳти ваҳшигарии режими саҳюнистӣ ба шаҳодат мерасанд, аммо дилхушии мо ин аст, ки миллати Яман, Ғаззаро танҳо нагузоштааст. Вай таъкид кард, мардуми Яман бо амалиёти низомӣ ва эҷоди маҳдӯдият дар Дарёи Сурх ва Халиҷи Адан, мавзеи худро дар ҳимоят аз Фаластин эълом кардаанд. Раиси Шӯрои олии сиёсии Яман ҳамчунин ҳузури миллионии мардуми Яман дар роҳпаймоии Рӯзи ҷаҳонии Қудсро нишонае аз пуштибонии қотеъ аз Фаластин, Ғазза, Каронаи Бохтарӣ ва Қудс баршумурд.
Дабири кулли ҷунбиши Ансоруллоҳ муқовимати мардуми Ғазза дар баробари саҳюнистҳоро сутуд
Саиди Абдулмалик Ал Ҳавсӣ, дабири кулли ҷунбиши Ансоруллоҳи Яман дар паёми вижае ба миллати Фаластин, бавижа муҷоҳидони Ғазза, зимни табрики Иди Саиди Фитр, сабру муқовимати онҳо дар баробари ҷиноёти режими саҳюнистиро арҷ ниҳод ва гуфт, мардуми Ғазза на танҳо рӯзадории моҳи Рамазонро ба ҷо овараданд, балки ифтихори ҷиҳоду пойдорӣ дар баробари ишғолгаронро ҳам насиб худ карданд. Вай ҳамчунин бо қадрдонӣ аз муҷоҳидатҳои размандагони яманӣ дар ҷабҳаҳои набард, бар нақши онҳо дар дифо аз ин кишвар таъкид кард.
Таҷовузи режими саҳюнистӣ ба ҷануби Лубнон
Режими саҳюнистӣ дар идомаи нақзи оташбас дар Лубнон бори дигар ҷануби ин кишварро омоҷи ҳамалоти ҳавоӣ қарор дод. Бар асоси гузоришҳо, як паҳподи режими саҳюнистӣ ду манзил дар шаҳраки Кафаркило дар ҷануби Лубнонро ҳадаф қарор дод. Артиши Исроил рӯзи шанбе ба Зоҳияи Бейрӯт низ ҳамла кард. Ҳамла ба Зоҳияи Бейрут барои нахустин бор аз замони эъломи тавофуқи оташбас миёни тарафайн аз ноябри гузашта буд.
Шиллики низомиёни саҳюнист ба сӯи Неруҳои ҳофизи сулҳ дар ҷануби Лубнон
Неруҳои ҳофизи сулҳи Созмони Милали Муттаҳид(UNIFIL) дар Лубнон дар иттилоияе аз тирандозии ҳушдоромези ишғолгарони саҳюнистӣ ба сӯи ин неруҳо дар ҷануби Лубнон хабар доданд. UNIFIL эълом кард, артиши режими Исроил аз хати обӣ дар ҷануби Лубнон ба самти неруҳои мо тирандозии ҳушдоромез анҷом дода, ки ин иқдом дар таъорузи ошкор бо қатънома 1701 аст. Гуфтанист, неруҳои ҳофизи сулҳи Созмони милал аз соли 1978 дар ҷануби Лубнон вазифаи барқарории оромишу назорат бар амалиёти оташбас ва сулҳ миёни Лубнону режими саҳюнистиро бар ӯҳда доранд.
Боздошти 8 шаҳрванди сурӣ тавассути низомиёни саҳюнист дар рӯстои Koya
Расонаҳои сурӣ гузориш доданд, ки артиши режими ишғолгари Исроил рӯзи шанбе 8 нафарро дар рӯстои Koya дар Рифи Даръо, ҷануби Сурия дар ҳоли кор дар замини худ боздошт кардааст. Неруҳои ишғолгари Исроил рӯзи ҷумъа низ ду ҷавони аҳли Koya-ро боздошт карда буданд. Ин рӯсто дар чанд рӯзи гузашта, саҳнаи ташдиди амалиёти низомии режими саҳюнистӣ ҳамроҳ бо ҷобаҷоии густардаи мардум аз хонаҳои худ дар рӯсто ва атрофи он ба маконҳои амнтар будааст.
Your Comment